zurlu (zúr-lu) sm, sf, adg zurlã (zúr-lã), zurlji (zúr-lji), zurli/zurle (zúr-li) – atsel tsi ari unã lãngoari di minti (tsi sh-u chiru mintea) shi nu mindueashti (giudicã) di-arada ca tutã-alantã dunjai; glar di minti; cicãnit la minti; loat di vimtu; loat di lunã; parmen; (fig:
1: zurlu = om tsi s-poartã ca un tsi u-ari chirutã mintea; expr:
2: burets zurlji = burets fãrmãcosh, tsi nu suntu bunj trã mãcari;
3: ca zurlu-gumarlu al Nastradin Hogea = zbor tsi s-dzãtsi, trã pezã, tr-atsel tsi s-alavdã cã nu-au vãrnã cusuri;
4: zurlul nu ari coarni si-l cunoshti = omlu zurlu easti ca tuts alantsã, nu-aspuni tsiva maxutarxu cari s-lu-aleagã di oaminjlji di-aradã;
5: cu zurlu ts-badz mintea, zurlu s-hii = va hii sh-tini zurlu, ma s-ti-acats s-fats alishvirishi cu-un zurlu)
{ro: nebun, dement}
{fr: fou, dément, forcené, vénéneux}
{en: insane, crazy, madman (madwoman)}
ex: nã ursã zurlã, tsi n pãduri-aurlã (angucitoari: tupoara, tsupata); unã eapã zurlã, alagã prit pãduri (angucitoari: tãporlu, tsupata); s-featsi ca zurlu (s-featsi cã easti glar); pristi nãs s-arucã zurlu (ca glar, ca zurlu); percea-lj si mutã zurlã (ca mintitã di vimtu); zurlul, zurlu lu adutsi n cali; zurlu fu tinir, zurlu sh-aush; di mbitat s-aspari shi zurlul; tradzi nãsã, tsãni schinlu, trãdzeari di zurlã, lu zmulsi schinlu cu tuti arãdãtsinj; zurla, cu perlji cãtrã naljurea, s-hiumusi s-lu-acatsã; cara s-vrei s-lj-ascachi tuts, s-ti fats ca zurlu shi s-li vershi tuti
§ zurleatsã (zur-leá-tsã) sf zurlets (zur-létsĭ) – lãngoarea (di minti) tsi-l fatsi omlu s-nu giudicã ca tutã lumea di-aradã; purtarea tsi lu-aspuni omlu cã easti zurlu; zurlami, zurlilji, glãrimi (fig: zurleatsã = purtari tsi sh-u-adutsi cu zurleatsa)
{ro: nebunie}
{fr: folie}
{en: madness}
ex: ãlj vinji zurleatsa; mintea cu zurleatsa (glãrimea) surãri suntu; lu-acãtsã zurleatsa shi ahurhi sã scãrcicã dintsãlj; fatsi zurlets, ca ficior; tinireatsã i zurleatsã
§ zurlami/zurlame (zur-lá-mi) sf zurlãnj (zur-lắnjĭ) – (unã cu zurleatsã)
ex: cu zurlamea-a ta, nj-featsish multã znjii
§ zurlilji/zurlilje (zur-lí-lji) sf zurlilj (zur-líljĭ) – (unã cu zurleatsã)
§ zurleashti/zurleashte (zur-leásh-ti) adv – ca di om zurlu
{ro: nebuneşte}
{fr: follement}
{en: maddening, crazy}
§ zurlamarã (zur-la-má-rã) sf zurlamãri (zur-la-mắrĭ) – lucru faptu glãreashti (ca di om zurlu); zurlumarã, glãrimi, zurleatsã, zurlami, zurlilji
{ro: nebunie, prostie}
{fr: folie, bêtise}
{en: crazyness, madness, stupidity}
ex: u-adrash di zurlamarã (di zurleatsã, di glãrimi)
§ zurlumarã (zur-lu-má-rã) sf zurlumãri (zur-lu-mắrĭ) – (unã cu zurlamarã)
§ zurlusescu (zur-lu-sés-cu) vb IV zurlusii (zur-lu-síĭ), zurluseam (zur-lu-seámŭ), zurlusitã (zur-lu-sí-tã), zurlusiri/zurlusire (zur-lu-sí-ri) – am unã lãngoari tsi mi fatsi sã-nj cher mintea shi s-nu pot s-giudic ca lumea di-aradã; zurlescu, nzurlusescu, glãrescu; (fig: zurlusescu = fac ca zurlu; ãnj yini dip canda s-glãrescu di minti; mi portu dip ca un tsi zurluseashti, tsi-sh cheari mintea)
{ro: înnebuni}
{fr: affoler, devenir fou, rendre fou}
{en: get mad, become insane}
ex: cãndu s-adunã oili, zurlusescu (fig: fac ca zurlili); Tulã, tsi, nj-ti zurlusish (nj-tsã chirushi mintea)?
§ zurlusit (zur-lu-sítŭ) adg zurlusitã (zur-lu-sí-tã), zurlusits (zur-lu-sítsĭ), zurlusiti/zurlusite (zur-lu-sí-ti) – tsi lãndzidzã di-unã lãngoari di minti sh-nu mata giudicã ca lumea di-aradã; zurlit, nzurlusit, glãrit
{ro: înnebunit}
{fr: affolé, devenu fou, rendu fou}
{en: who got mad, who became insane}
§ zurlusiri/zurlusire (zur-lu-sí-ri) sf zurlusiri (zur-lu-sírĭ) – atsea tsi s-fatsi cãndu un zurluseashti; zurlusiri, nzurlusiri, glãriri
{ro: acţiunea de a înnebuni; înnebunire}
{fr: action de s’affoler, de devenir fou, de rendre fou}
{en: action of getting mad, of getting insane}
§ nzurlusescu (nzur-lu-sés-cu) vb IV nzurlusii (nzur-lu-síĭ), nzurluseam (nzur-lu-seámŭ), nzurlusitã (nzur-lu-sí-tã), nzurlusi-ri/nzurlusire (nzur-lu-sí-ri) – (unã cu zurlusescu)
ex: Ndriulu nzurluseashti
§ nzurlusit (nzur-lu-sítŭ) adg nzurlusitã (nzur-lu-sí-tã), nzurlusits (nzur-lu-sítsĭ), nzurlusiti/nzurlusite (nzur-lu-sí-ti) – (unã cu zurlusit)
§ nzurlusiri/nzurlusire (nzur-lu-sí-ri) sf nzurlusiri (nzur-lu-sírĭ) – (unã cu zurlusiri)
§ zurlescu (zur-lés-cu) vb IV zurlii (zur-líĭ), zurleam (zur-leámŭ), zurlitã (zur-lí-tã), zurliri/zurlire (zur-lí-ri) – (unã cu zurlusescu)
ex: mi zurli (zurlusi) tu ciocuti; zurli, mãratlu, di itia-a znjiiljei; tini zurlish, va ti bat ma s-nu isihãseshti
§ zurlit (zur-lítŭ) adg zurlitã (zur-lí-tã), zurlits (zur-lítsĭ), zurliti/zurlite (zur-lí-ti) – (unã cu zurlusit)
§ zurliri/zurlire (zur-lí-ri) sf zurliri (zur-lírĭ) – (unã cu zurlusiri)
